رسالة حب من الحكومة للمواطن

رسالة حب من الحكومة لأبنها المواطن
عزيزى المواطن بتاع النضال
يا راكب دماغك و غاوى الحلال
نصيحة يا صاحبى بلاش الخيال
و غمض عيونك و ربى العيال
بلاش المناكفة و لايم و عيش
هتتعب معانا و سهمك يطيش
نلفق للاهلك قضية حشيش
و تصبح حكاية و نكتة و مثال
تعالى و هاودنا و عدى الامور
و عيش فى الطراوة و خش الطابور
لكن لو هتزعل و دمك يفور
هنشهد نهايتك فى بحر الرمال
هتصبح حرامى هتصبح امير
هتصبح حرامى و ندل و اجير
و نقدر نلخبط فى اصلك كتيير
و جدك شحاتة هيصبح شحات
هنحلف ان الحبايب شافوك
بتقبض يا خاين و تقتل اخوك
ساعتها مراتك هتلعن ابوك
و تلطم و تنعى احط الرجال
مالكش انت دعوة بى اا اللى ضاع
و مين اللى شارى و مين اللى باع
و مين اللى كيل و مين اللى شال
فحب الحكومة و حب السلام
و علم ولادك يشدوا الحزام
علشان بكرة هياكلو حمام
و ينسوا الاسية و ينسوا الهزال
فلازم يا صاحبى تغمض عنيك
و طنش علينا نطنش عليك
و اياك تشاور نقطع ايديك
و تصبح مواطن ما يسواش ريال
عزيزى المواطن بتاع النضال
يا راكب دماغك و غاوى الحلال
نصيحة يا صاحبى بلاش الخيال
و غمض عيونك و ربى العيال

هههههههههههه جامده اوى

حلوة يافيتو

جمييييييييييييييييييييل خالص

نصيحة يا صاحبى بلاش الخيال

إيه يا عم شريف المقال الجامد ده

يابنى انا خايف عليك والله
خلى بالك من نفسك
جاااااااااااااااااامد