النهاردة .. خطوة على طريق بكرة ..

من حوالي 4 او 5 شهور ..

كان ليا موضوع عن العصيان المدني ..

وده كان بمناسبة .. الدعوة الى اقامة عصيان مدني ساعتها ..
وكان مطلوب فيه ..
ان محدش ينزل الشارع .. وتعليق علم مصر في البلكونات ..

ساعتها اتكلمت على العصيان المدني ..
وساعتها برده ..
كان رد الفعل على الدعوة دي .. ظاهر و موجود في جزء صغير من مدينه شبرا ..
اللي بالفعل .. كان اشبه بمدينه اشباح ..
محدش نزل الشارع ..
وكانت اعلام مصر في جزء صغير من بنايات هذه المنطقة ..

ساعتها برده ..
قلت ان مش مشكلة يكون اللي ساهم 100 شخص او 50 او شخص واحد ..
لأن الشخص ده .. حيكون شخصين بعد كده .. وفي يوم حيكونوا الف ..
وبعدين حيكونوا مليون ..

الدعاية للعصيان المدني ده .. كانت ضعيفة شوية ..
وبالتالي كانت الناس اللي عرفته قليلين ..

بس المرة دي الدعاية اكبر بكتير .. وفي ناس كتير جدا عرفت عنه .. اكتر من المرة اللي فاتت ..
والدليل على كده ..
زي ما ححكيلكم دلوقتي :-
------------------------------------
1-
كنت طالع من صلاة الفجر ..
وبعدين صدفة .. معدي من جنب عربية فول ..
حسيت برغبة جارفة اني اقف اكل عليها ..
بصراحة .. دي تاني مرة في حياتي اكل على عربية فول ..
واول مرة كانت في يوم فاكرة كويس جدا ..
لأنه اول يوم ازوغ فيه من المدرسة ..
ههههههههههههه
ويوميها زوغت .. مع اصحابي طبعا ..
لأن التزويغ جماعة .. ثوابه اكبر ..
خصوصا لو كنت شاطر ..
وبالتالي العقوبة اللي كانت حتكون عليك حتقل .. ولما العدد يزيد .. العقوبة تقل اكتر ..
وهو ده قصدي بثوابها اكتر ..
ههههههههههههههههه
ماتفهمونيش غلط

المهم ..
طلبت من بتاع الفول يعملي طلب فول ..
ووقفت اكل .. الجو جامد جدا .. قبل الشروق بشوية .. وطبعا الشوارع فاضية خالص ..
الصبي بتاع الراجل بتاع الفول .. بيقوله هو الجو هادي ليه النهاردة ..
قاله اصلهم بيقولوا النهاردة في ثورة ..

انا بصراحة اتعجبت ..
لأن كون ان بتاع الفول يعرف ان في حاجة سياسية زي ما بيقول حتحصل النهاردة ..
يبقى ده دليل على قوة الدعاية المرة دي ..
-----------------------------------------
2-
دكتور في جامعة عين شمس ..
طلب في محاضرته من الطلاب انهم ما يجوش يوم الحد ..
لأن اليوم ده حيكون فيه قلق كبير ..
وان الامن حيبدأ يتلكك وياخد اي حد .. والامن المركزي حيكون قالب الدنيا في الجامعة ..
طبعا .. لما اختي قالتلي كده ..
استنتجت ان الدكتور حاجة من اتنين ..
اما انه زيه زي بتاع الفول .. ومش فاهم بالضيط ايه اللي حيحصل .. وده مش مستحيل ..
واما انه يكون خبيث جدا جدا جدا ..
وبيحاول ينجح العصيان المدني ده بمنتهى المكر والخباثة ..

-----------------------------------------
3-
واحدة جارتنا ..
قالت لماما انها يمكن ما تروحش الشغل يوم الحد ..
لأن حيكون في ثورة ..
بس ده مش اكيد ..
هي حتستنى لغاية الساعة 9 او 10 ..
لو حست ان ممكن يكون في قلق في الشغل .. يبقى لازم تروح .. ويتحسبلها نص يوم ..
احسن من لما ما يتحسبش خالص ..
-----------------------------------------
4-
وانا ماشي في الشارع .. سمعت اتنين بياعين خضار .. ست وراجل ..
الست بتقول للراجل ..
انا حفرش بكرة بعدالضهر بس .. لأن الصبح حيكون في ثورة ..
وانا عندي عيال ..
قالها .. لأ .. انا ماليش دعوة بالسياسة ..
ده اكل عيش .. والحكومة مش عايزانا ناكل اساسا ..
-----------------------------------------

الاربع امثلة اللي فاتت ..
حقيقية ..
ولازم اقولها ..
لان في بينها وبين بعض تشابهات .. واختلافات ..

التشابهات :
** ان الاربع او اشخاص مش فاهمين يعني ايه (( عصيان مدني )) ..
ولكنهم عبروا عنها بكلمة ثورة .. لأن دي اقرب لكونها شيء سياسي حيحصل .. اللي غالبية المصريين يعرفوه انه ثورة .. لأن دي حصلت في مصر كتير .. انما مفيش خبرة بالعصيان المدني ..
** كلهم ربطوا الموضوع بأكل العيش .. باستثناء دكتور الجامعة .. اللي انا مش عارف لغاية دلوقتي ومش قادر استنبط وجهه نظره او هدفه بالضبط ..
وده ممكن يكون برده شيء من الذكاء والدهاء بالنسبة له ..
** ان الدعاية وصلت ليهم كلهم بصرف النظر عن فهم كل واحد فيهم للدعوة ..

الاختلافات :
مش كبيرة جدا ..
ومش مهم نركز عليها ..
----------------------------------------------

اللي محيرني بقى جدا ..
هو دكتور الجامعة ..
لأن كونه انه يقول للطلاب بتوعة محدش ينزل بكرة .. قلنا انه ممكن يكون ذكي جدا جدا جدا ..
وممكن يكون زي بتاع الفول .. مش فاهم حاجة ..

لان بتاع الفول شايف ان اللي حيحصل هو ثورة ..
ومعنى كده .. ان حيكون في ناس كتير جدا .. متجمعين في مكان معين .. بيتظاهروا لشيء معين ..
ولهدف معين ..

وده عكس العصيان المدني تماما تماما تماما ..
لأن العصيان المدني له مقومات .. واخلاقيات ..
اهمها هو منع التظاهر .. واللاعنف ..

وفي الحالة دي ..
يبقى مفيش تجمعات .. ومفيش تظاهرات .. ومفيش خروج من البيت اساسا .. وبالتالي مفيش شغل ..
وبالتالي توقف الحياة تماما .. وبالتالي خسائر بالجملة وضغط بالجملة على الحكومة المصرية ..
وبالتالي الرضوخ الاجباري لطلبات الجماهير ..

طيب لما الدكتور يقول كده .. يبقى هو بيدعو لحاجة من اتنين ..
اما الدعوة لعدم الذهاب الى الجامعة يومها ..
وبالتالي مشاركة الطلاب في العصيان المدني دون علمهم ..
لأنهم بالتأكيد حيخافوا من الامن اللي يمكن ياخدهم .. وسط الثورة والمظاهرات اللي قال عليها الدكتور ..
وبالتالي خوفهم من الخروج ده .. معناه .. نجاح العصيان امام الناس ..

ولما الجرايد تاني يوم تنشر صور للجامعة وهي فاضية ..
الطلاب يبدأوا يفهموا يعني ايه عصيان مدني ..
انه ابتعاد .. مش تظاهر ..
انه اضراب .. مش ضرب ..
وبالتالي الدعة للعصيان اللي بعده .. يبدأ ينجح اكتر ..
وهنا يظهر دهاء الدكتور ..

ممكن برده يكون الدكتور فاهم انها ثورة .. وبيكلم الطلاب بجد .. لخوفه عليهم بجد ..
وهنا يظهر ان الدكتور هو مجرد بياع فول لابس بدلة وكرافات ..

--------------------------------------

ثاني شيء ..
لازم نوضحة ..
ان الناس حتى الان فاهمه ان الاضراب ده ممكن يضيع عليهم راتب يوم .. او مكسب يوم ..
وهو خسارة كبيرة لهم ..
لكن الحقيقي انه ده ممكن يزود الراتب الحقيقي عن طريق انخفاض الاسعار في المستقبل ..
وممكن كمان يزود مكسب اليوم ..
عن طريق عودة الرواج للأسواق ..
لكن ده طبعا مش بسببهم ..
ده بسبب انخفاض الرؤية المستقبليه للمواطن المصري .. لعدم معرفته .. او بمعنى ادق .. لجهله بمعنى التلاحم من اجل الحقوق ..
وده طبعا بسبب عدم وجود ثقافة سياسية حقيقية نتيجة طبعا لخطوات متعمدة لزيادة الجهل السياسي .. من جهات معروفة ..

--------------------------------------------------

اخر شئ احب اوضحه ..
هو عدة نقاط ..
اولا:
العصيان المدني هو شكل استخدمه مارتن لوثر كنج .. عن طريق الامتناع عن دفع الضرائب ..
للحفاظ على حقوق السود ومنع الاضطهاد والعبودية ..
استخدموه المكسيكيين برده في الحرب مع امريكا .
واستخدمه كارل ماركس برده كحملة في اوروبا قبل الثورة للقضاء على الاضطهاد ..

ثانيا :
لازم يكون عن طريق الشعب كله .. وعن طريق اللاعنف .. وبشكل غير قانوني ..
للوصول الى هدف معين او لتوصيل رسالة معينه .. وده الاهم في الموضوع .

ثالثا :
العصيان المدني اقوى من المقومة او التظاهر العنيف ..
لأن اللاعنف .. وهو مبدأ العصيان ...
ممكن يمحي العنف نفسه ..
كما ان ضحاياه قليلين ..
وامكانية العقاب بتكون اقل .. زي التزويغ انت وصحابك مع بعض في مدرسة عدد طلابها صغير ..

رابعا :
وصول الدعوة الى عصيان مدني الى جميع الطبقات بالشكل ده ..
ده في حد ذاته خطوة على الطريق الصحيح ..
لأن في المرة الاولى .. من كام شهر ..
كان الناس اللي عارفه اقل كتير .. وبالتالي .. التزايد الكبير ده ..
حيكون بعد 4 او 5 دعوات تانيين ..
الاف الاضعاف اكتر و اكتر واكتر ..

وحيبدأ الناس يعرفوا معناه .. ويعرفوا كمان معلومات عنه .. لما يحسوا ان الموضوع ده حيحصل كذا مرة تاني ..

خامسا :
العصيان المددني شكل من اشكال الرقي في التعبير عن الغضب ..
ودايما نلاقي ان الدول المتحضرة .. بتعمل عصيان مدني دون عنف ..
زي مثلا فرنسا .. ونستثني احداث الشغب الاخير .. لأنها كانت بيد المهاجرين الغير فرنسيين .. وطبعا معظمهم من دول العالم الثالث .
ودايما دول العالم الثالث بتقوم بثورات اعتمادا على العنف ..
زي امريكا الجنوبية (( خصوصا بوليفيا وكولومبيا و الاكوادور و غيرهم ))
وجنوب شرق اسيا (( زي اندونيسيا و ماليزيا و باكستان و الهند ))
لرؤيتهم ان العنف اكبر تاثيرا ..
وده غلط ..
لأن العنف بيجيب عنف ..
واللاعنف بيوقف العنف .. ويحقق مطالب العنف
ويمكن نستثني من دول العالم الثالث .. لبنان ..
بسبب الثقافة الكبيرة جدا جدا جدا اللي موجودة في كل طبقات الشعب ..
لدرجة ان لما يكون في عصيان مدني في لبنان .. تتحول مدنها كلها كلها كلها .. الى مدن اشباح مهجورة ..

المهم اننا بدأنا نفكر..
وبدأنا نتحرك ..
وده بفضل ناس بتحب بلدها بجد .. شكرا بجد ليهم .
د. جورج اسحق
د. عبدالوهاب المسيري
د. فتحي السعيد ..
وغيرهم
ومش مهم النهاردة .. المهم بكرة ..

الله عليك يا بوكى
انا بجد كنت ناوبيه
انزل موضوع بخصوص هذا العصيان
فعلا انا حسيت من كلام اهلى فى البيت والجيران
والهدوء اللى بيسود منطقتى اينعم هى هادئه ولكن
اليوم هدوء قاتل للغايه وحاسه ان البلد وقفت خالص
سكوووووووووووووووووووووووووووووون

بشكرك بجد على مجهودك الرائع ده

الشعب ابتدي يفهم

ولما الشعب يبتدي يفهم
يبقي في امل نتغير
lol!

يامسهل

يارب الناس كلها تفهم كدة والحقيقة دى

وشكرا ياعمرو على الموضوع دة بجد انا استفد منه اوى

السؤال المهم لما يحصل عصيان مدنى
الحكومه هتنزل الاسعار ودى حاجه انا معتقدش انها كويسه
وبعدين انا ضدك فى حاجه فى احداث 18 و19 يناير 1977 لما الناس كسرت البلد و الاتوبيسات والترام ده وقف الحكومه عند حدها و خلاها تنزل وتخفض الاسعار وكانت الزياده ساعتها شلن او تعريف مش جنيه واتنين جنيه
اظن ان الامر لازم يتبصلوا بشكل تانى

العنف لا يولد الا العنف ..

تفتكر انا لما اكسر عربية واحد زيي ..
واحنا الاتنين عندنا مشاكل مع الحكومة ..
تفتكر كده انا حليت مشكلتي ..

لا ..
يتهيالي ان احنا الاتنين خسرانين ..
انا خسرت ضميري .. والتاني خسر ممتلكاته ..

انما لما تمتنع عن الشغل ..
انت بتخسّر الحكومة بس .. ولما الحكومة تبدا تخسر .. تبدأ تتحرك ..
ده غير ان الاعتراض السلمي ..
والاجتماع على حاجة زي العصيان المدني ..
يخوف الحكومة اكتر واكتر واكتر ..
لعدة اسباب :
1- انها حتبدأ تحس ان في اجتماع من كل طبقات الشعب ضدها ..
2- انها مش حتقدر تستعمل العنف كالعادة .. لأنها مش حتلاقي حد تضربه اساسا .. كل الناس في بيوتها ..
وطبعا .. القانون ما بيعاقبش واحد قاعد في بيته مش عايز يشتغل .
3- شكلها قدام العالم العربي اللي هي حاسة بريادة قدامه يبدأ يضعف ..
4- شكلها قدام المجتمع الدولي .. انها حكومة ضعيفة .. حيضعف من رصيدها كتير .. لأنك عمرك ما تسمع عن انقلاب شعبي او اعتراضات شعبية او مظاهرات او اي حاجة من هذا القبيل ... الا ولازم تحس بتعاطف مع الشعب ده .. حتى لو كنت ما تعرفش حكومته دي فاشلة ولا كويسة ..
لأن صعب جدا تجمع الشعب كله بكل تياراته على شيء واحد .. ويتفقوا عليه ..

كلام صح

غالبا كل من اسمه مصطفي بيفكر زيك

انت رابع مصطفي يقول الكلام الي فوق دا

غالبا المشكلة في الاسم

ههههههههههههههههههههههههههه